«Մուլտի գրուպ» -ի աշխատակիցները չեն հեռանում․ կառավարությունից սպասում են վճռորոշ պատասխանի

Հայաստանի կառավարությունը «Մուլտի գրուպի» աշխատակիցներին կպատասխանի վաղը։ Այս մասին պարզ է դարձել իշխանությունների կողմից փակված՝ Գագիկ Ծառուկյանի ձեռնարկությունների բողոքող աշխատակիցների և կառավարության ներկայացուցիչ Համլետ Նազարյանի հերթական հանդիպման արդյունքներով, գրում է News.am-ը։

«Հիշեցնենք, որ սա արդեն երկրորդ հանդիպումն է. հինգշաբթի կայացած հանդիպմանը Նազարյանը խոստացել էր կառավարության պատասխանը փոխանցել երկուշաբթի օրը։ Այսօր Համլետ Նազարյանը հայտնել է, որ կփոխանցի պահանջները (ինչը խոստացել էր անել նաև հինգշաբթի) և մեկ-երկու ժամվա ընթացքում հետ կզանգի՝ վաղվա հանդիպման պայմանավորվածությունը ձեռք բերելու համար։ Հենց վաղվա հանդիպմանն էլ պարզ կդառնա, թե երբ և ինչպես կվերսկսվեն ձեռնարկությունների աշխատանքները։

Բողոքի ակցիայի մասնակիցները որոշել են չցրվել և սպասել զանգին։ Պահանջները բաղկացած են երեք կետից՝ երբ կբացվեն օբյեկտները, երբ կհանվեն աշխատակիցների հաշիվների վրա դրված արգելանքները, և ով է վճարելու օբյեկտների պարապուրդի համար։

Մարդիկ ընդգծում են, որ պարապուրդը շարունակվում է ավելի քան մեկ ամիս, իրենք ապրուստի և բանկերի պահանջած վարկերը մարելու միջոցներ չունեն, իսկ օբյեկտները միլիարդավոր դրամների վնասներ են կրում։ Իրավիճակը բոլորովին անորոշ է նաև ապագայի առումով. օրինակ՝ Ծառուկյանին պատկանող հյուրանոցներում հարյուրավոր համարներ են ամրագրված աշնանը Հայաստանում սպասվող COP-ի մասնակիցների համար, և պարզ չէ՝ հյուրանոցները կկարողանա՞ն ընդունել հյուրերին, թե ոչ»,- ընդգծում են բողոքի ակցիայի մասնակիցները։