Այսօր մեկնարկում են ԱՄՆ-ի և Իրանի բանակցությունները. Թրամփ

ԱՄՆ նախագահ Դոնալդ Թրամփը հայտարարել է, որ երկուշաբթի Վաշինգտոնն ու Թեհրանը նոր բանակցություններ կսկսեն՝ Մերձավոր Արևելքում խաղաղության հաստատման նպատակով։ Նրա խոսքով՝ քննարկումների հիմնական թեմաները լինելու են Հորմուզի նեղուցում նավագնացությունն ու Իրանի միջուկային ծրագրի ապամիջուկայնացումը։

Թրամփը լրագրողներին հայտնել է, որ նախընտրել է ժամանակավորապես զերծ մնալ Իրանի դեմ նոր հարվածներից՝ բանակցություններին հնարավորություն տալու համար։ Նա նաև պնդել է, որ հարվածներից հրաժարվելու խնդրանքով իրեն դիմել են ինչպես Իրանը, այնպես էլ ԱՄՆ-ի տարածաշրջանային գործընկերները՝ Սաուդյան Արաբիան, ԱՄԷ-ն և Կատարը։ Սակայն իրանական լրատվամիջոցները հերքել են, թե Թեհրանը նման խնդրանք է ներկայացրել։

Միևնույն ժամանակ Իրանը հայտարարել է, որ մոտ է Օմանի հետ համաձայնության՝ Հորմուզի նեղուցով նոր ծովային երթուղու վերաբերյալ։ Իրանի ԱԳՆ պաշտոնական ներկայացուցիչ Էսմայիլ Բաղային նշել է, որ քննարկվում է այնպիսի երթուղի, որը կհարգի երկու երկրների ինքնիշխան իրավունքներն ու կապահովի Իրանի ազգային շահերն ու անվտանգությունը։ Նա, սակայն, ընդգծել է, որ դա չի նշանակում նեղուցում լիարժեք նավագնացության վերականգնում։

Հորմուզի նեղուցը շարունակում է մնալ ԱՄՆ-ի և Իրանի միջև հիմնական տարաձայնություններից մեկը։ Մինչ պատերազմը նավերը ազատորեն անցնում էին նեղուցով, սակայն հակամարտության ընթացքում Իրանը սահմանափակել է երթևեկությունը և պահանջում է պահպանել վերահսկողությունն ու տարանցման վճարների գանձումը, ինչին Վաշինգտոնը դեմ է։

Իրանի խորհրդարանի ազգային անվտանգության հանձնաժողովի ներկայացուցիչ Հասան Ղաշղավին հայտնել է, որ միջնորդները փորձում են վերակենդանացնել հունիսին համաձայնեցված ԱՄՆ–Իրան փոխըմբռնման հուշագիրը, որը կարող է հիմք դառնալ ավելի լայն խաղաղության համաձայնագրի համար։

Բանակցությունների մասին տեղեկություններից հետո համաշխարհային շուկաներում նավթի գներն անկում են գրանցել։ ԱՄՆ-ի West Texas Intermediate տեսակի նավթի գինը ասիական առևտրի մեկնարկին նվազել է 4,7%-ով՝ մեկ բարելի դիմաց հասնելով 80,72 դոլարի։