ՏԵՍԱՆՅՈՒԹ. Հարավային Կորեայում ռազմական դրություն Է հայտարարվել

Հարավային Կորեայի նախագահ Յուն Սեոկ Յոլը ժողովրդին ուղղված հեռուստաուղերձում հայտարարել է երկրում ռազմական դրություն մտցնելու մասին, հաղորդում է Yonhap գործակալությունը։

«Ես հայտարարում եմ ռազմական դրություն՝ արմատախիլ անելու հյուսիսկորեամետ ուժերին և պաշտպանելու ազատ սահմանադրական կարգը», - ասել է նա։ Ըստ Yonhap-ի՝ ավելի վաղ կառավարության հետ արտակարգ հանդիպման ժամանակ Յուն Սեոկ Յոլը հայտարարել էր իմփիչմենթի փորձերի մասին:

Իր ելույթում նախագահը ռազմական դրության սահմանումն անվանել է «անխուսափելի միջոց՝ ապահովելու մարդկանց ազատությունն ու անվտանգությունը, ինչպես նաև երկրի կայունությունը հակապետական ​​ուժերի գործողություններից»։ Նա նշել է, որ ռազմական դրությունը կարող է որոշակի անհարմարություններ պատճառել քաղաքացիներին, սակայն իշխանությունները կենտրոնանալու են նման անհարմարությունները նվազագույնի հասցնելու վրա։

«Արտաքին քաղաքականության մեջ ոչ մի փոփոխություն չկա, Կորեայի Հանրապետությունը կատարում է իր պարտականություններն ու ներդրումը միջազգային հանրության առաջ»,- հավելել է Յուն Սեոկ Յոլը։

Միևնույն ժամանակ Հանրապետության պաշտպանության նախարարությունը հայտնել է, որ տեղի է ունեցել բոլոր զինված ուժերի գլխավոր հրամանատարների խորհրդակցությունը և տրվել հանձնարարականներ՝ ուժեղացնելու զինված ուժերի արտակարգ իրավիճակների պատրաստությունն ու պատրաստվածությունը։