Արտակարգ դրություն Ամստերդամում. ձերբակալվել են տասնյակ պաղեստինամետ ցուցարարներ
Ոստիկանության աշխատակիցները Ամստերդամի կենտրոնում ձերբակալել են մի քանի տասնյակ մարդկանց, ովքեր մասնակցել են ի պաշտպանություն Պաղեստինի կազմակերպված չարտոնված ցույցին, գրում է Algemeen Dagblad թերթը՝ հղում անելով իրավապահների տեղեկատվությանը։ Քաղաքում մինչև հինգշաբթի՝ նոյեմբերի 14-ի առավոտյան, հայտարարված է արտակարգ դրություն, հետևաբար այս ընթացքում արգելվում է ցանկացած հանրահավաք անցկացնել։
Պարբերականի տվյալներով՝ շուրջ հարյուր մարդ եկել է Ամստերդամի Դամ հրապարակ՝ չնայած ոստիկանության արգելքին։ Մի քանի նախազգուշացումներից հետո իրավապահները սկսել են ցուցարարներին դուրս անել հրապարակից։ Բերման ենթարկված ցուցարարներին տարել են ավտոբուսներով։ Ըստ Algemeen Dagblad-ի թղթակցի՝ հրապարակում մթնոլորտը «շատ լարված տեսք չի ունեցել, այլ՝ բարյացակամ»։
Ամստերդամում նոյեմբերի 8-ին «Այաքս»-«Մաքքաբի Թել Ավիվ» ֆուտբոլային հանդիպման ավարտից հետո հարձակման են ենթարկվել իսրայելական ակումբի երկրպագուները։ Հարձակվողները զինված են եղել սառը զենքերով, նրանցից ոմանք կրել են պաղեստինյան դրոշներ և բղավել պաղեստինամետ կարգախոսներ։ Իսրայելի ԱԳՆ-ի տվյալներով՝ վիրավորվել է առնվազն տասը իսրայելցի։
