ՏԵՍԱՆՅՈՒԹ. Ստադիոն գնալիս ունենալ լապտեր. հերթական մութ ֆուտբոլը Հայաստանում
Ֆուտբոլի Հայաստանի առաջնության 8-րդ տուրի կենտրոնական խաղում «Նոան» 2:0 հաշվով առավելության հասավ գործող չեմպիոն «Փյունիկի» նկատմամբ: Այս հանդիպումը սակայն նշանավորվեց ոչ միայն «Նոայի» տպավորիչ խաղով ու հաղթանակով: Աբովյանի քաղաքային մարզադաշտը, որտեղ «Նոան» անց է կացնում տնային հանդիպումները կրկին հոսանքազրկվեց: Այս անգամ ֆուտբոլիստներն ու մարզադաշտ եկած ֆուտբոլասերները մթության մեջ մնացին մոտ 10 րոպե:
Հիշեցնենք, որ օգոստոսի 20-ին տեղի ունեցած Կոնֆերենցիաների լիգայի փլեյ-օֆֆի «Նոայի» և Սլովակիայի գավաթակիր «Ռուժոմբերոկի» հանդիպման ժամանակ Աբովյանի մարզադաշտը հոսանքազրկվել էր մոտ կես ժամով: Տեղի ունեցածը զայրույթի ալիք էր բարձրացրել հասարկության շրջանում:
Օրեր առաջ, ԱԺ «Քաղաքացիական պայմանագիր» խմբակցությունն քննարկում էր կազմակերպել վերջին ամիսներին հանրապետությունում էլեկտրաէներգիայի խափանումների վերաբերյալ «Էլեկտրական էներգիայի մատակարարման ոլորտում առկա խնդիրները եւ դրանց լուծման ուղիները» թեմայով:
Հոսանքազրկումների վերաբերյալ իշխող խմբակցության ներկայացուցիչների կոշտ հայտարարությունների ֆոնին Աբովյանի մարզադաշտի երեկվա հոսանքազրկումը ստիպում է ենթադրել, որ առկա խնդրի լուծման ճանապարհը մեղմ ասած մշուշոտ է:
Ցավով պետք է արձանագրենք, որ ստադիոնի լուսարձակների անջատումը տխուր ավանդույթ է դառնում մեր երկրում: Ու քանի դեռ խնդրի լուծման համար հստակ քայլեր չեն ձեռնարկվում, մարզասերներին մնում է միայն մասնավորապես Աբովյանի մարզադաշտ գնալ լապտերներով:
