ՏԵՍԱՆՅՈՒԹ. Հայտնի են Սիցիլիայում զբոսանավի խորտակման ժամանակ մյուս անհետ կորածների ինքնությունները
Morgan Stanley միջազգային բանկի վարչության նախագահ Ջոնաթան Բլումերը եւ Clifford Chance միջազգային իրավաբանական ընկերության իրավաբան Քրիս Մորվիլոն այն վեց անձանց մեջ են, որոնք համարվում են անհետ կորած զբոսանավի խորտակման պատճառով, տեղեկացրել է ВВС-ն՝ հղում կատարելով Սիցիլիայի Քաղաքացիական պաշտպանության ծառայությանը։
Անհետ կորած են համարվում նաեւ բրիտանացի տեխնոլոգիական մագնատ, 59-ամյա Մայք Լինչը եւ նրա դուստրը՝ 18-ամյա Հաննան։
56 մետրանոց «Bayesian» նավում 22 մարդ կար, այդ թվում բրիտանացիներ, ամերիկացիներ եւ կանադացիներ։ 15 մարդ փրկվել է, նրանց թվում՝ մեկ տարեկան բրիտանացի մի աղջիկ։
Սիցիլիայի Քաղաքացիական պաշտպանության ծառայությունը հաստատել է, որ հայտնաբերվել է նաեւ նավի խոհարարի դին։ Զբոսանավը շրջվել էր տեղի ժամանակով ժամը 05.00-ին մոտ, ուժեղ փոթորկի պատճառով, որոնողական աշխատանքները պետք է վերսկսվեին տեղի ժամանակով ժամը 06.30-ին, տեղեկացրել է La Repubblica իտալական թերթը։
Զբոսանավը նավարկում էր բրիտանական դրոշի ներքո, անձնակազմը ՝12 եւ ուղեւորները՝ 12 հոգի, երկուշաբթի խորտակվել են Պորտիչելո նավահանգստից ոչ հեռու։ Ականատեսները Ansa իտալական տեղեկատվական գործակալությանը հայտնել են, որ փոթորկի ժամանակ նավի խարիսխը իջեցվել է, ինչի հետեւանքով կայմը կոտրվել է, իսկ նավը կորցրել է հավասարակշռությունը եւ խորտակվել։ Նավը գտնվում է 50 մետր խորությունում, եւ սուզակները պատրաստվում են վերսկսել կորածների որոնումները։
