Էլինա Ավանեսյանն առաջին հաղթանակն է տարել Հայաստանի դրոշի ներքո

Էլինա Ավանեսյանն առաջին մրցախաղն է անցկացրել Հայաստանի դրոշի ներքո և հաղթանակ տարել։

Աշխարհի 58-րդ ռակետը Ցինցինատիի WTA-1000 շարքի մրցաշարի որակավորման առաջին փուլում 6-3, 6-1 հաշվով պայքարից դուրս է թողել Լորեն Դևվիսին (ԱՄՆ, 410-րդ ռակետ)։ Մրցախաղը տևել է 1 ժամ 23 րոպե։

Հայ թենիսիստուհին ԱՄՆ-ում անցկացվող մրցաշարի որակավորման երկրորդ փուլում մրցելու է Հերիեթ Դարթի (Մեծ Բրիտանիա, 78-րդ ռակետ) դեմ։

21-ամյա Էլինա Ավանեսյանը վերջերս է ստացել ՀՀ անձնագիր և մրցաշարերում արդեն ներկայացնում է Հայաստանը։ Մինչև այս նա հանդես էր գալիս Ռուսաստանի դրոշի ներքո։

Վերջերս Էլինա Ավանեսյանն առաջին անգամ հասել էր WTA-250 շարքի մրցաշարի եզրափակիչ։