«Ցանկացած այլախոս այս իշխանության կողմից ճանաչվում է որպես թշնամի, ոչ թե ընդդիմություն»․ Լարիսա Ալավերդյան

ՀՀ մարդու իրավունքների առաջին պաշտպան Լարիսա Ալավերդյանի խոսքով՝ Հայաստանում քաղաքական հետապնդումների թեման և ատելության խոսքի տարածումը վաղուց արդեն կարելի է բնորոշել որպես «դոմեստիկ ռասիզմ»՝ ներքին ռասիզմ։ Այս մասին նա հայտարարել է քաղաքական դրդապատճառներով հետապնդվող անձանց իրավունքների հարցերով ստեղծված հանձնախմբի առաջին մամուլի ասուլիսի ժամանակ։

Ալավերդյանի խոսքով՝ այսօր Հայաստանում ատելության խոսքն ու թշնամանքի մթնոլորտը տարածվել են հասարակության տարբեր շերտերում։

«Այն խավը, որը գրագետ է, օրինապահ է, հստակ ճանաչում է թե՛ այլոց արժանապատվությունը, թե՛ սեփական արժանապատվությունը, այսօր հայտնվել է մի իրավիճակում, երբ նույնիսկ ՔՊ-ական շատ քաղաքագետներ ասում են, թե ընդդիմությունը թշնամի է։ Այսինքն՝ այլախոսը»,- ասել է նա։

Նա նշել է, որ իրեն ընդդիմադիր չի համարում, քանի որ կուսակցական չէ և որևէ քաղաքական գործընթացի չի մասնակցել:

«Ցանկացած այլախոս ՀՀ-ում այս իշխանության կողմից ճանաչվում է որպես թշնամի, ոչ թե որպես ընդդիմություն։ Հիմա մենք պարտավոր ենք ինչ-որ ձև միավորվել և վերջ տալ այս վիճակին»,- նշել է Ալավերդյանը։

Նրա խոսքով՝ թշնամանքի մթնոլորտը տարածվում է ոչ միայն հասարակության մեջ, այլ նաև հասել է ընտանիքներ, բարեկամական և ընկերական շրջանակներ։

Ալավերդյանը նշել է, որ քաղաքական հետապնդումների ենթարկվող անձինք միաժամանակ դարձել են նաև անձնական ատելության թիրախ, ինչը նա բնորոշել է որպես «21-րդ դարում վենդետայի դրսևորում»։