Հայաստանում ծնելիությունը շարունակում է նվազել

Հայաստանում ծնելիության ցուցանիշները շարունակում են նվազել։ Այս մասին ՀՀ աշխատանքի և սոցիալական հարցերի նախարարին կից հասարակական խորհրդի նիստում   ասաց  Արսեն Թորոսյանը, փոխանցում է Արմենպրեսը:

Նախարարի ներկայացրած տվյալներով՝ 2025 թվականին Հայաստանում գրանցվել է 32 հազար 42 ծնունդ։ Համեմատության համար՝ 2024 թվականին այդ թիվը կազմել է 33 հազար 593, իսկ 2023 թվականին՝ 36 հազար 590։

Թորոսյանի խոսքով՝ նվազում է նաև պտղաբերության ցուցանիշը՝ մեկ վերարտադրողական տարիքի կնոջ հաշվով ծնվող երեխաների միջին թիվը։

«Ծնելիության անկումը շարունակվում է։ Նվազում է նաև պտղաբերության ցուցանիշը, այսինքն՝ մեկ վերարտադրողական տարիքի կնոջ հաշվով ծնվող երեխաների թիվը։ Կան գործոններ, օրինակ՝ ամուսնության տարիքը, որոնք պետությունը չի կարող ուղղակիորեն փոխել, սակայն, եթե պտղաբերության ցուցանիշն ավելի նվազի, դա ցանկացած երկրի համար լուրջ խնդիր կլինի»,- ասել է նախարարը։

Նա նշել է, որ իրավիճակը հաղթահարելու համար անհրաժեշտ է փոխել հանրային մտածողությունը և պետական աջակցության ծրագրերի միջոցով խրախուսել ծնելիության աճը։

«Պետք է մտածողության փոփոխության և պետական ծրագրերի միջոցով փորձենք փոխել այս իրավիճակը»,- նշել է Արսեն Թորոսյանը։