Հայտնի է՝ ինչ հրացանով էին փորձում սպանել Թրամփին․ նոր մանրամասներ
ԱՄՆ նախկին նախագահ Դոնալդ Թրամփի դեմ մահափորձի մեջ կասկածվողը օգտագործել է AR-556 տիպի հրացան, որն օրինական ճանապարհով ձեռք է բերել նրա հայրը: Այս մասին հայտնել է Հետաքննությունների դաշնային բյուրոյի հատուկ գործակալ Քևին Ռոջակը:
Ռոջակը հայտնել է, որ կասկածյալի ընտանիքը համագործակցում է հետաքննության հետ։ Հետաքննությունների դաշնային բյուրոն նաև հաստատել է, որ կասկածյալի մեքենայում հայտնաբերվել է կասկածելի սարք, որը զննվել է պայթուցիկ նյութերի փորձագետների կողմից: Գերատեսչությունը նաեւ հասանելիություն է ստացել հրաձիգի հեռախոսին, այն տեղափոխվել է Կուանտիկոյի ՀԴԲ լաբորատորիա, հաղորդում է Washington Post-ը:
Հիշեցնենք, որ Ռոջակը հայտնել էր, որ նախկին նախագահի դեմ մահափորձի մեջ կասկածվողը միայնակ է աշխատել: Ոչ մի ցուցում չկա այն մասին, որ նա պատկանում էր որևէ գաղափարախոսության կամ մտավոր բնույթի որևէ խնդիր ուներ:
