Եվրոպայում ԱՄՆ մի քանի ռազմակայաններ բերված են մարտական պատրաստականության բարձր աստիճանի՝ հնարավոր ահաբեկչական սպառնալիքի պատճառով: Անվտանգության մակարդակը բարձրացվել է երկրորդ ամենաբարձր մակարդակի, այն մտավախությունների ֆոնին, որ ահաբեկչական հարձակումը կարող է թիրախավորել ԱՄՆ ռազմական անձնակազմը կամ օբյեկտները: Այս մասին հայտնում է CNN-ը՝ հղում անելով երկու ամերիկացի պաշտոնյաների։

Պաշտոնյաները հայտնել են, որ բազաները, այդ թվում՝ ԱՄՆ բանակի կայազորը Շտուտգարտում, Գերմանիա, որտեղ տեղակայված է ԱՄՆ Եվրոպական հրամանատարությունը, բարձրացրել են իրենց զգոնության մակարդակը մինչև հարկադիր պաշտպանության «Չարլի» մակարդակի, ասել են պաշտոնյաները: Այս կարգավիճակը «կիրառվում է, երբ միջադեպ է տեղի ունենում կամ ստացվում է հետախուզական տեղեկատվություն, որը ցույց է տալիս անձնակազմի կամ օբյեկտների դեմ ահաբեկչական գործողության կամ հարձակման հավանականությունը»:

Եվրոպայում տեղակայված ամերիկացի պաշտոնյաներից մեկը CNN-ին ասել է, որ իրենք չեն տեսել նման մակարդակի սպառնալիք «առնվազն 10 տարի»՝ հավելելով, որ դա սովորաբար նշանակում է, որ զինվորականները ստացել են «ակտիվ վստահելի սպառնալիք»:

CNN-ը պարզաբանում է, որ անհասկանալի է, թե ինչ հետախուզություն է դրդել ուժեղացված անվտանգության միջոցառումներին, սակայն եվրոպական իշխանությունները նախազգուշացրել են պոտենցիալ ահաբեկչական սպառնալիքի մասին Փարիզում Օլիմպիական խաղերից առաջ և Եվրոպայի ընթացիկ ֆուտբոլի առաջնության ժամանակ։