18 տարին լրացած 220 հոգի Հայաստանում մանկատան խնամքին է. ԶԼՄ

Հայաստանում աշխատանքի և սոցիալական հարցերի ենթակայության տակ գտնվող շուրջօրյա խնամքի երկու հաստատությունում միասին վերցրած 220 չափահաս քաղաքացի է ապրում, հայտնել են նախարարությունից «Ազատության» հարցմանն ի պատասխան։

«Մարի Իզմիրլյանի անվան մանկատուն» ՊՈԱԿ-ում փաստացի խնամվում է 18 տարին լրացած 26 քաղաքացի, նրանցից ամենամեծը 24 տարեկան է։

«Խարբերդի մասնագիտացված մանկատուն» ՊՈԱԿ-ում 18 տարին լրացած ու շուրջօրյա խնամքի հաստատություններում բնակվող 194 մարդ կա։ Խարբերդում չափահաս ամենամեծ քաղաքացին 54 տարեկան է։

Իսկ 18-24 տարեկան 85 խնամվող կա, 25-30 տարեկան՝ 63 հոգի, 31-35 տարիքային խմբում 22 մարդ է, 36-40 տարեկան 15 խնամվող կա, 41-45 տարեկանների խմբում 5 հոգի է, 46-50 տարեկան 3 մարդ, 50-55 տարեկանների տարիքային խմբում 1 խնամվող կա։

Հունիսի 12-ին Կառավարություն-Ազգային ժողով հարցուպատասխանի ժամանակ վարչապետ Նիկոլ Փաշինյանն անդրադարձել էր թեմային ու հայտարարել, թե Հայաստանում մանկատան խնամքի տակ 40-50 տարեկան անձինք կան: