Խոշոր հրդեհ՝ Երասխ գյուղում. այրվել է մոտ 2000 հակ անասնակեր. կար կասկած, որ երեխան խոտի դեզի մեջ է
Այսօր՝ հունիսի 23-ին, խոշոր հրդեհ է տեղի ունեցել Արարատի մարզում։ Ժամը 19:05-ի սահմաններում ՀՀ Ներքին գործերի նախարարության Փրկարար ծառայության 911 ճգնաժամային կառավարման ազգային կենտրոն ահազանգ է ստացվել, որ Երասխ բնակավայրի Րաֆֆու փողոցի տներից մեկում կուտակված անասնակեր է այրվում, և կան կասկածներ, որ վառվող խոտի մեջ երեխա կա։
Հրշեջները, պարեկները, ոստիկաններն ու գյուղացիները ոչ միայն պայքարում էին կրակի տարածման դեմ, այլ նաև որոնողական աշխատանքներ էին կատարում՝ երեխային հայտնաբերելու համար։
Բարեբախտաբար, կարճ ժամանակահատվածում երեխային հայտնաբերում են հարևան խոտի դեզի մեջ։
Հրդեհի հետևանքով այրվել է մոտ 2000 հակ անասնակեր խոտ։
Թե ինչն է եղել հրդեհի պատճառը, պարզվում է։
