ՏԵՍԱՆՅՈՒԹ․ 15 րոպեն առավելագույն ժամկետն է, որ մեքենաները պետք է դուրս գան երթևեկելի հատվածից․ Ավինյան
Երևանի քաղաքապետ Տիգրան Ավինյանը գործակարգավարական նիստում անդրադարձել է մայրաքաղաքում տեղի ունեցող պատահարներին՝ կարևորելով վթարների դեպքում մեքենաները երթևեկելի մասից հեռացնելը։
«Քաղաքապետարանի և երևանցիների խնդիրն այն է, որ երբ մեքենաները բախվում են, նույնիսկ եթե շատ ծանր բախում չէ, ահռելի խնդիր է առաջանում՝ երկար, հերթով»,- ասել է նա։
Տիգրան Ավինյանի խոսքով, պետք է 15 րոպեի ընթացքում վթարված մեքենաները հեռացնել. «Հիմա, ոնց որ թե, մի փոքր ավելի բարելավվել է, բայց ամրագրումն օրենքով մեզ պետք է լինելու»,- ասել է նա։
Քաղաքապետը նշել է, որ հասկանում է ապահովագրական ընկերությունների խնդիրները․ «Բայց միակ երկիրն ենք, միակ քաղաքն՝ աշխարհում, որ ապահովագրական ընկերությունների ռիսկերը բացառված են, և բոլորս պետք է սպասենք մինչև վերջին դրամը հստակ իմանան՝ այո, 233.000 դրամի վնաս է եղել»։
Նա շեշտել է. «15 րոպեն առավելագույն ժամկետն է, որ մեքենաները պետք է դուրս գան ճանապարհային երթևեկելի հատվածից»։
