Գալուզինը չի հստակեցրել՝ որտեղ է Մոսկվան ցանկանում հյուպատոսություններ բացել
Մոսկվան ու Բաքուն քննարկում են Ադրբեջանում Ռուսաստանի գլխավոր հյուպատոսությունների ստեղծման հարցը, Ռուսաստանի Դաշնությունը այս հարցում հաջողության հույս ունի:
Այս մասին Սանկտ Պետերբուրգի միջազգային տնտեսական ֆորումի շրջանակներում «Ռուսաստան-Ադրբեջան» նիստում ասել է ՌԴ փոխարտգործնախարար Միխայիլ Գալուզինը։
«Կցանկանայի նշել, որ մեր հարաբերությունների առաջանցիկ զարգացումը, ներառյալ առևտրատնտեսական համագործակցության զարգացման նոր հնարավորությունների որոնումը, համահունչ կլինի Ադրբեջանում մեր գլխավոր հյուպատոսությունների ստեղծմանը։ Ադրբեջանցի ընկերների և մեր միջև այդ զրույցն այժմ ընթանում է և հուսով ենք, որ այն նույնպես հաջողությամբ կպսակվի»,-նշել է ՌԴ փոխարտգործնախարարը։
Գալուզինը չի հստակեցրել՝ որտեղ է Մոսկվան ցանկանում հյուպատոսություններ բացել։ Անցած օրերին ՌԴ խորհրդի արտաքին հարաբերությունների հանձնաժողովի նախագահ Գրիգորի Կարասինը հայտարարել էր, որ Ռուսաստանը մտադիր է օկուպացված Ստեփանակերտում Գլխավոր հյուպատոսություն բացել և այդ հարցում ակնկալում է Ադրբեջանի աջակցությունը։
ՌԴ արտգործ նախարարը խոսել է նաև` 3+3 ձևաչափի մասին, որի ակտիվ մասնակիցներն են Ռուսաստանը և Ադրբեջանը, կարող է տարածաշրջան բերել իրեն անհրաժեշտ կայունություն և անվտանգություն:
Նրա խոսքով, արտատարածաշրջանային ուժերը, ինչպես ցույց է տալիս պրակտիկան, տարածաշրջան են գալիս իրենց սեփական, հիմնականում առճակատման օրակարգով։
«Դա խանգարում է մեր ընդհանուր խնդիրների լուծմանը»,-ասել է ՌԴ ԱԳ փոխնախարարը Պետերբուրգի միջազգային տնտեսական համաժողովի շրջանակներում Ռուսաստան-Ադրբեջան գործարար երկխոսության ընթացքում։
