Սերժ Սարգսյանը՝ սահմանազատումը չեղարկելու և ԳՇ պետի մասին
Շարժման հաղթանակի բանաձեւը փողոցային ճնշումն է, ուրիշ բանաձեւ չկա: Այս մասին այսօր՝ մայիսի 31-ին, Նոր Նորքում դատարանի դիմաց լրագրողների հետ զրույցում ասաց ՀՀ երրորդ նախագահ Սերժ Սարգսյանը:
«Ես տեսնում եմ, որ Բագրատ Սրբազանը բավականին հաստատակամ է»,-ասաց նա:
Հարցին՝ իշխանափոխությունից հետո նոր իշխանությունները կարո՞ղ են վիճարկել արդեն տեղի ունեցած սահմանազատման գործընթացը, օրինակ, հանել սահմանի սյուները Սերժ Սարգսյանը պատասխանեց. «Դա չափազանց բարդ կլինի անելը, բայց այնտեղ էլ լուծումներ կան: Եկեք այդ լուծումների մասին չխոսենք, բայց գրեթե 100 տոկոսով վստահ եմ, որ այո, նոր իշխանությունները կարողանալու են հարցն ապօրինի ճանապարհից բերել օրինական դաշտ: Իհարկե խաղաղ ճանապարհով: Մենք հիմա ի՞նչ ունենք, որ պատերազմի մասին մտածենք»:
Հարցին՝ ինչու՞ դա չի անում Նիկոլ Փաշինյանը, նա արձագանքեց. «Որովհետև նա կապիտուլյանտ է։ Ձեռքերը բարձրացրել, հանձնվել է, դիմացինն էլ պահանջում է: Ասում է՝ կամ տուր, կամ էս կանեմ, էն կանեմ»:
Սերժ Սարգսյանը՝ ԳՇ պետի աշխատանքին գնահատական տալու լրագրողներին հարցերին ի պատասխան էլ ասաց․ «ՀՀ ԶՈՒ ԳՇ պետը իմ պաշտպանության նախարար ժամանակ, գերագույն հրամանատար եղած ժամանակ նշանակալի պաշտոն չէր զբաղեցնում»։
«Ես հիմա իր մասին ինչ ասեմ»,- եղել է Ս. Սարգսյանի պատասխանը։
