Ուկրաինան «ոտնատակ է արել» ԱՄՆ-ի առաջարկած մորատորիումը. Գալուզին

Ռուսաստանի Դաշնության փոխարտգործնախարար Միխայիլ Գալուզինը հայտարարել է, որ ուկրաինական կողմը չի պահպանել էներգետիկ ենթակառուցվածքների վրա հարձակումներն արգելող ամերիկյան նախաձեռնությունը։

«ՌԻԱ Նովոստի»-ի հետ զրույցում դիվանագետը նշել է, որ 2025 թվականի գարնանը Կիևի իշխանությունները 136 անգամ խախտել են էներգաօբյեկտներին հարվածելու մորատորիումը։ Գալուզինի խոսքով՝ այդ սահմանափակումը ակտիվորեն առաջ էր մղում ԱՄՆ-ը, սակայն Վլադիմիր Զելենսկու ռեժիմը փաստացիորեն անտեսեց այն։ Նա հավելել է․ «...Նույնը վերաբերում է 2025 թվականի գարնանը էներգաօբյեկտներին հարվածելու մորատորիումին. այն ժամանակ Կիևը խախտեց այն 136 անգամ: Ի դեպ, հիշեցնեմ, որ այս մորատորիումն ակտիվորեն առաջ էր մղում ամերիկյան կողմը, իսկ Վլադիմիր Զելենսկու ռեժիմը, ըստ էության, ոտնատակ արեց այն»:

2025 թվականի մարտի 18-ին տեղի ունեցած հեռախոսազրույցի ընթացքում Միացյալ Նահանգների նախագահ Դոնալդ Թրամփն առաջարկել էր Ռուսաստանի Դաշնության նախագահ Վլադիմիր Պուտինին 30-օրյա ժամկետով փոխադարձաբար դադարեցնել հարվածները էներգետիկ կառույցներին, ինչին ՌԴ ղեկավարը տվել էր իր համաձայնությունը։ Առաջարկին միանալու մասին հայտնել էր նաև Վլադիմիր Զելենսկին։ Այդուհանդերձ, ապրիլի 19-ին Պուտինը փաստել էր, որ ուկրաինական կողմը չի դադարեցրել հարձակումները ՌԴ էներգաենթակառուցվածքների վրա՝ ավելի քան 100 անգամ խախտելով ձեռք բերված պայմանավորվածությունը։