ՔՊ–ական պատգամավորը` եկեղեցու հարկման նախագծի մասին
ՀՀ ԱԺ «Քաղաքացիական պայմանագիր» խմբակցությունն աշխատանքներ է տանում Հայ առաքելական սուրբ եկեղեցու հարկման նախագիծը ստեղծելու ուղղությամբ։ Այս մասին ԱԺ մշտական հանձնաժողովների համատեղ նիստ ժամանակ ասել է ՔՊ–ական պատգամավոր Ծովինար Վարդանյանը։
«Եկեղեցու հարկման վերաբերյալ որևէ նախագիծ դեռևս չկա շրջանառության մեջ, բայց ես և գործընկերներս աշխատում ենք այդ ուղղությամբ։ Այս խոսակցությունն ինչ բացվել է, հնչել է պատասխան, որ եկեղեցին հարկվում է, բայց պետք է հասկանալ, թե ինչ են ենթադրում եկեղեցի ասելով։ Գուցե եկեղեցու հոգևոր ծառայողները եկամտահարկ վճարում են, ինչը նորմալ է։ Կա մի բայց` մենք այս պահին ուսումնասիրում ենք եկեղեցու տնօրինության տակ գտնվող հազարավոր գույքեր և խոսքը վանքերի մասին չէ, այլ առևտրային, հասարակական և արտադրական տարածքների, ինչպես նաև հարյուրավոր բնակելի տների մասին»,– նշել է Վարդանյանը։
Նրա խոքով՝ ամեն ինչ ուսումնասիրվում է, և կգա ժամանակը, երբ նախաձեռնությունը կունենա իր տրամաբանական ելքը և համապատասխան նախագիծ կլինի։
«Հայաստան» խմբակցության քարտուղար Արծվիկ Մինասյանն էլ ասաց` նման հայտարարությունների ֆոնին Հայ առաքելական եկեղեցու ենթակայության տակ գտնվող անշարժ գույքը պետք է համադրել Հայաստանում գործող այլ կրոնական կազմակերպությունների անշարժ գույքի հետ։
