Տվյալ օպերատորն առանց բեյջի էր եւ ոստիկանությունը գործնականում հնարավորություն չունի նույնականացնելու: Այս մասին այսօր՝ ապրիլի 30-ին, Ազգային ժողովում՝ լրագրողների հետ զրույցում ասաց «Քաղաքացիական պայմանագիր» խմբակցության քարտուղար Արթուր Հովհաննիսյանը՝ անդրադառնալով Տավուշում ոստիկանների կողմից օպերատորի նկատմամբ կիրառված բռնության դեպքին:

Դիտարկմանը, որ նա ասել է, որ լրագրող է, ՔՊ-ական պատգամավորն արձագանքեց. «Ասելով չի, լիքը մարդ կարող է լիքը բան ասել: Ոստիկանությունը առանց բեյջի մարդուն պետք է ասելով նույնականացնի՞: Այսինքն ոստիկանությունը, երբ գործողություններ է իրականացնում, պետք է գնա բոլորից հարցնի՝ դու ով ես, ներողություն, կարելի՞ է ձեզ բերման ենթարկել: Ոչ իհարկե: Լրագրողներն ու օպերատորները, եթե տվյալ տարածքում գործունեություն են իրականացնում, ապա պետք է կրեն բեյջեր, որ նման միջադեպերում չհայտնվեն: Իսկ եթե այդտեղ ծառայողական լիազորությունների վերազանցում կա, ապա կա իրավական պրոցես, թող ծառայողական քննություն հարուցվի»:

Հարցին՝ ի՞նչ կանի, եթե տեսնի, որ լրագրողը առանց որեւէ փաստ ներկայացնելու հայտարարի, որ ինքը այսինչ երկրի գործակալ է, միլիոնավոր դոլարներ է ստանում, որ ինչ-որ գործընթաց անի, նա պատասխանեց. «Ես հաստատ լրագրողի ծնոտին չեմ հարվածի: Եթե ես հասկանամ, որ դուք ինձ զրպարտում կամ վիրավորում եք, կդիմեմ դատարան: Ես որեւէ մեկի ծնոտին չեմ խփելու»,-ասաց նա:

Նշենք, որ ապրիլի 27-ին ՀՀ Տավուշի մարզի Իջևան-Կիրանց ավտոճանապարհին դիմակավորված ոստիկանները կանգնեցրել են լրատվամիջոցների աշխատակիցներին տեղափոխող ավտոմեքենան, դուրս են հանել նրանց, գետնին տապալել NewDay.am լրատվական կայքի օպերատոր Ջանիբեկ Խաչատրյանին, ձեռնաշղթաներ հագցրել նրան ու փորձել բերման ենթարկել:

Նա լրագրողների հետ զրույցում նաև ասել է, որ այն պրոցեսները, որոնց մեջ  ներգրավված են նաև հոգևորականները, համարում եմ Հայաստանի պետականության դեմ իրականացվող պրոցեսներ: 

«Հայաստանին փորձ են անում ներքաշել պատերազմի մեջ, ներս փրկիչներ հրավիրելու համար՝ Հայաստանը նորից դարձնելու երրորդ երկրների սպասարկման վայր:

4 ադրբեջանական գյուղերը վերջին փաստարկներն են Ադրբեջանի համար՝ Հայաստանի վրա լեգիտիմ հարձակում իրականացնելու առումով և բոլորը սրա մասին շատ լավ գիտեն: Այս պրոցեսը մեկ նպատակ է հետապնդում՝ ԼՂ- հարցում չստացվեց ՀՀ-ին ներքաշել պատերազմի մեջ, հիմա էլ փորձում են 4 գյուղերի կոնտեքստում ՀՀ-ին ներքաշել ռազմական գործողությունների մեջ, որից հետո բոլորս գիտենք ինչ հետևանքներ կարող են լինել»,- ասաց Հովհաննիսյանը:

Դիտարկմանը, թե սահմանազատման ու սահմանագծման պրոցեսից հետո երաշխիք չեք տալիս, որ պատերազմ չի լինի Հովհաննիսյանն արձագանքեց. «Չկա որևէ երաշխիք, որ 100 տոկոսանոց մեզ կապահովագրի: Մենք խոսում ենք էսկալացիոն ռիսկերը նվազեցնելու, ՀՀ պետական սահմաները ֆիքսելու մասին և որևէ մեկին մեր վրա հարձակվելու համար լեգիտիմ իրավունք չտալու մասին»: