Փաշինյանը որոշել է գնացքով շրջայց իրականացնել. «Հրապարակ»
Վարչապետ Նիկոլ Փաշինյանը եկող շաբաթ պատրաստվում է աշխատանքային շրջայց իրականացնել գնացքով։ Շրջայցի մեկնարկը տրվելու է Նորագավիթ կայարանից՝«Հարավկովկասյան երկաթուղու» տնօրինության էլեկտրագնացքով։ Մեր աղբյուրների փոխանցմամբ՝ Փաշինյանը դադար է առնելու Սպանդարյան կայարանում, որտեղ աշխատանքների հետ կապված դիտարկումներ ունի։ Այս մասին հայտնում է «Հրապարակ»-ը:
Ըստ խոսակցությունների՝ գնացքով շրջայց իրականացնելու վարչապետի նպատակը երկաթուղայինների աշխատանքին հետևելն է, կայարանների վիճակին ծանոթանալը։
Փաշինյանի այցին «Հարավկովկասյան երկաթուղու» աշխատակիցները երկու շաբաթ է՝ պատրաստվում են։ Ներկում-թարմացվում են կայարանների էլեկտրասյուների հենակները, թարմացվել է նաւ էլեկտրագնացքը, որով Փաշինյանը շրջագայելու է։
Նշենք, որ «ՀԿԵ» ՓԲԸ-ն «Ռուսական երկաթուղիներ» ԲԲԸ-ի դուստր ընկերությունն է։2008 թվականին «Ռուսական երկաթուղիներ» ԲԲԸ-ի և Հայաստանի Հանրապետության միջև կնքվել է կոնցեսիոն պայմանագիր՝ «Հայկական երկաթուղի» ՓԲԸ-ն «ՀԿԵ» ՓԲԸ-ին կառավարմանը հանձնելու մասին։ Համաձայն պայմանագրի՝ կոնցեսիոն կառավարման ժամկետը 30 տարի է։
