ՏԵՍԱՆՅՈՒԹ. Իսրայելում արտահերթ ընտրությունների պահանջով մեծ ցույց է տեղի ունեցել
Երուսաղեմում Կնեսետի (խորհրդարանի) շենքի մոտ տեղի է ունեցել բազմահազարանոց ցույց՝ Իսրայելում արտահերթ ընտրություններ անցկացնելու և Գազայի հատվածում պատանդներին շուտափույթ ազատ արձակելու պահանջով, հայտնում է Kan ռադիոն։ Ynet պորտալը նշում է, որ սա հրեական պետության ամենամեծ բողոքն է Գազայում պատերազմի սկզբից ի վեր՝ 2023 թվականի հոկտեմբերի 7-ին ՀԱՄԱՍ-ի զինյալների հարձակումից հետո։
The Jerusalem Post-ի փոխանցմամբ՝ Քնեսեթում հավաքվել է ավելի քան 100 հազար մարդ։ Պորտալի տվյալներով՝ նրանք խորհրդարանի համալիրի մոտ «տասնյակ վրաններ» են խփել՝ բողոքի ակցիան ամբողջ շաբաթվա ընթացքում շարունակելու մտադրությամբ։
The Jerusalem Post-ը նշում է, որ Երուսաղեմում եւս մի քանի ցույցեր են տեղի ունեցել պատանդների շուտափույթ ազատման եւ արտահերթ ընտրությունների անցկացման կարգախոսով։ Դրանցից մեկը տեղի է ունեցել վարչապետ Բենիամին Նեթանյահուի գրասենյակի մոտ և համընկել նրա մամուլի ասուլիսի հետ։ Բացի այդ, տասնյակ ակտիվիստներ սկսել են փակել քաղաքի երկու թաղամասերի ճանապարհները, որից հետո ոստիկանությունն այդ գործողությունները հայտարարել է անօրինական և հատուկ տեխնիկա օգտագործել՝ ցուցարարներին ճանապարհից դուրս հանելու համար։ Ոստիկանության լրատվական ծառայությունը հայտնել է, որ Երուսաղեմում հասարակական կարգը խախտելու համար մեկ անձ բերման է ենթարկվել։
