Վրաստանի ֆուտբոլի հավաքականը պատմության մեջ առաջին անգամ հանդես կգա Եվրոպայի առաջնության եզրափակիչ մրցաշարում։

Եվրո-2024-ի որակավորման մրցաշարի անցումային փուլի C ենթախմբի եզրափակչում Վրաստանի հավաքականը Թբիլիսիում ընդունել էր Հունաստանի հավաքականին։ Հանդիպման հիմնական և լրացուցիչ ժամանակում գոլեր չեն արձանագրվել: 11-մետրանոց հարվածաշարում վրացիները 4-2 հաշվով հաղթել են և դուրս եկել Եվրո-2024-ի խմբային փուլ:

Վրաստանի ֆուտբոլի ազգային ընտրանու համար պատմական հաջողություն է՝ նվաճել Եվրոպայի առաջնության ուղեգիր։ Խմբային փուլում Վրաստանի հավաքականի մրցակիցները կլինեն Պորտուգալիան, Չեխիան և Թուրքիան:

Վրաստանի մայրաքաղաքում խաղի ավարտից հետո զանգվածային տոնակատարություններ են տեղի ունեցել: