«Չուզեցի, չառաջադրվեցի». Անդրանիկ Քոչարյան

ԱԺ «Քաղաքացիական պայմանագիր» խմբակցության պատգամավոր Անդրանիկ Քոչարյանը հայտարարել է, որ չի առաջադրվել Ազգային ժողովի պաշտպանության և անվտանգության հարցերի մշտական հանձնաժողովի նախագահի պաշտոնում, քանի որ այդ որոշումն ինքն է կայացրել։

Լրագրողների հետ զրույցում նա նշել է, որ պատրաստ էր արտահայտել իր դիրքորոշումը, եթե լիներ առաջադրում, սակայն գործընթացն այլ ձևաչափով է կազմակերպվել, և ինքը որոշել է չառաջադրվել։

Քոչարյանի խոսքով՝ ութ տարվա ընթացքում ղեկավարած հանձնաժողովը զգալի արդյունքներ է գրանցել՝ առանձնացնելով հատկապես Ապրիլյան քառօրյա պատերազմի և 44-օրյա պատերազմի հանգամանքներն ուսումնասիրող քննիչ հանձնաժողովների զեկույցները։

Պատգամավորը նաև հայտնել է, որ այլևս չի լինելու պաշտպանության և անվտանգության հարցերի հանձնաժողովում։ Նա արդեն առաջադրվել է որպես պետաիրավական հարցերի մշտական հանձնաժողովի անդամ։

«Պետաիրավական հանձնաժողովի տիրույթում են նաև քննչական մարմինների, գլխավոր դատախազի և այլ կառույցների հաշվետվությունները, որոնք առնչվում են նաև անվտանգությանը։ Կարծում եմ՝ իմ փորձառությունն այնտեղ նույնպես օգտակար կլինի»,- ասել է նա։

Քոչարյանը փոփոխությունը համեմատել է Մեսչյանի հայտնի երգի հետ՝ նշելով. «Ես փոխում եմ սլաքները»։ Նրա խոսքով՝ նոր դիրքում պատրաստվում է նոր մոտեցումներ բերել՝ շարունակելով զբաղվել երկրի անվտանգությանն առնչվող հարցերով։