ՀԷՑ-ը 21-րդից դարձել է 13-րդ խոշոր հարկատու. Ալեքսանյանի հայտարարությունը

Ազգային ժողովի նախագահի տեղակալի թեկնածու Վահագն Ալեքսանյանն ուշադրություն է հրավիրել պետական մասնակցությունից հետո ՀԷՑ-ի և ԶՊՄԿ-ի հարկային ցուցանիշների աճին:

Ազգային ժողովի՝ օգոստոսի 3-ի նիստին ԱԺ նախագահի տեղակալի թեկնածու Վահագն Ալեքսանյանն անդրադարձել է «Ուժեղ Հայաստան» խմբակցության ղեկավար Նարեկ Կարապետյանի այն պնդմանը, թե պետական կառավարման անցած ընկերություններն ունեն զրո օգուտ: Նա նշել է, որ ՀԷՑ-ը մինչև ժամանակավոր կառավարչի նշանակումը Հայաստանի 1000 խոշոր հարկատուների ցանկում 21-րդն էր, իսկ հիմա զբաղեցնում է 13-րդ հորիզոնականը՝ ընդգծելով արձանագրված շեշտակի աճը:

Ալեքսանյանի փոխանցմամբ՝ նմանատիպ պատկեր է նաև Զանգեզուրի պղնձամոլիբդենային կոմբինատի դեպքում:

«ԶՊՄԿ-ն մինչև պետական մասնաբաժին ունենալը 8-9 տարում վճարել է այնքան հարկ, ինչքան պետական մասնաբաժին ունենալուց հետո 1-2 տարում: Թվերը շատ կոնկրետ չասեմ: 1-2 տարում պետական մասնակցություն ունենալուց հետո վճարել է այնքան հարկ, ինչքան դրանից առաջ նախկինում վճարել է 8-9 տարում: Դուք այս տարբերությունը տեսնո՞ւմ եք, թե՞ չեք տեսնում»,- հայտարարել է նա: