«Նրանք բոլորը կրակի հետ են խաղում». Պեսկով

Արևմտյան երկրները կրակի հետ են խաղում՝ քննարկելով Ուկրաինա զորքեր ուղարկելու հնարավորությունը, լրագրողներին ասել է ՌԴ նախագահի մամուլի քարտուղար Դմիտրի Պեսկովը։ Նա վտանգավոր է անվանել Ֆրանսիայի նախագահ Էմանուել Մակրոնի կողմից նման առաջարկի ի հայտ գալու փաստը։

Կրեմլի խոսնակը նշել է, որ Մոսկվան «մեծ թվով հակասական հայտարարություններ» է լսում Արևմուտքից՝ Ուկրաինա ՆԱՏՕ-ի զորքեր ուղարկելու վերաբերյալ, սակայն «այս քննարկելու փաստը վտանգավոր է»։ Նա նշել է, որ Մակրոնի հայտարարությունները, թե «մենք պետք է քննարկում սկսենք այս հարցի շուրջ», հնչում են այն փաստարկների ֆոնին, որոնք Արևմուտքին պետք են «որպեսզի Ռուսաստանը ռազմավարական պարտություն կրի»։

«Նրանք բոլորը կրակի հետ են խաղում»,- ընդգծել է Պեսկովը՝ հավելելով, որ Գերմանիայի սպաների հետ միասին, որոնք քննարկում են Ռուսաստանի դեմ հարվածները, այս ամենը հանգեցնում է «իրավիճակի հետագա դեգրադացման»։ «Իհարկե, սա չափազանց անպատասխանատու պահվածք է»,- տեղի ունեցածը գնահատել է Կրեմլի ներկայացուցիչը։

Պեսկովը նշել է, որ «Մոսկվայի համար գլխավորն իր նպատակներին հասնելն է», իսկ «Ռուսաստանը բաց երկիր է դրանց հասնելու քաղաքական և դիվանագիտական ​​տարբերակների համար»։