Իրանի արտաքին գործերի նախարարը կոչ է արել բոյկոտել իսրայելական ապրանքները

Իրանի արտաքին գործերի նախարար Հոսեյն Ամիր Աբդոլլահիանը Իսլամական համագործակցության կազմակերպության անդամ երկրների արտգործնախարարների արտահերթ հանդիպման ժամանակ կոչ է արել բոյկոտել իսրայելական ապրանքները և հրեական պետությանը հեռացնել ՄԱԿ-ի Գլխավոր ասամբլեայից:

«Ջիդդայում ԻՀԿ արտաքին գործերի նախարարների արտահերթ հանդիպման ժամանակ ես ընդգծեցի ՄԱԿ-ի Գլխավոր ասամբլեայից Իսրայելի ցեղասպան ռեժիմի արագ վտարման և այլ միջազգային կազմակերպություններին այս ռեժիմի անդամակցության դադարեցման անհրաժեշտությունը:

Այս ռեժիմի հետ դիվանագիտական ​​հարաբերությունների խզումը, իսրայելական ապրանքների բացարձակ բոյկոտը կարող են դիտարկվել որպես Պաղեստինին աջակցելու գործնական միջոցներ», – գրել է Իրանի արտգործնախարարը X-ում:

Հիշեցնենք՝ Գազայի հատվածի ճգնաժամի վերաբերյալ Իսլամական համագործակցության կազմակերպության (ԻՀԿ) արտակարգ նիստին մասնակցելու համար Իրանի արտաքին գործերի նախարար Հոսեյն Ամիր Աբդոլլահիանը երեքշաբթի Թեհրանից մեկնել էր Ջիդդա։ Ջիդդա մեկնելուց առաջ իրանցի դիվանագետը հանդիպել է Թեհրանում Սաուդյան Արաբիայի դեսպան Աբդուլլահ բին Սաուդ ալ-Անզիի հետ։