ԱՄՆ–ն պատժամիջոցներ է սահմանել Ռուսաստանի օդատիեզերական ուժերի և «Վագներ»–ի նկատմամբ

ԱՄՆ Պետդեպարտամենտը միջուկային զենքի չտարածման պատժամիջոցների ցանկում ներառել է Ռուսաստանի օդատիեզերական ուժերը, մասնավոր ռազմական Wagner ընկերությունը, Սանկտ Պետերբուրգի «Элтехнорд» ընկերությունը, ինչպես նաև ռուսաստանցի Պավել Շևելինին ու Հյուսիսային Կորեայի քաղաքացի Ռիմ Յոնգ Հյոկին: Համապատասխան հրամանը հայտնվել է Ամերիկյան դաշնային ռեգիստրի կայքում։

Ինչպես երևում է փաստաթղթից, պատժամիջոցները տարածվում են նաև սև ցուցակում հայտնված ընկերությունների և անհատների «հաջորդների, ստորաբաժանումների և մասնաճյուղերի» վրա։ Սահմանափակումները մտցվել են զանգվածային ոչնչացման զենքերի չտարածման մասին երկրի օրենսդրության ենթադրյալ խախտման պատճառով, ներառյալ միջուկային զենքը Իրանի, Հյուսիսային Կորեայի և Սիրիայի հետ կապված։

ԱՄՆ Պետդեպարտամենտն արգելում է որևէ տեսակի պայմանագիր կնքել պատժամիջոցների տակ գտնվող անձանց և կազմակերպությունների հետ, նրանց օգնություն տրամադրել, զենք և ռազմական տեխնիկա վաճառել և արտահանման հսկողության տակ գտնվող ապրանքներ գնելու ԱՄՆ լիցենզիաներ տալ: