Մոսկվան հեռակա ձերբակալել է Ուկրաինայի նախկին դեսպանին․հայտի է պատճառը

Մոսկվայի Բասմանի դատարանը հեռակա ձերբակալել է Ղազախստանում Ուկրաինայի նախկին դեսպան Պյոտր Վրուբլևսկուն՝ ատելություն կամ թշնամանք հրահրելու քրեական գործով։ Պատճառը նրա արած հայտարարությունն է. դիվանագետն ասել էր, որ Կիևը փորձում է հնարավորինս շատ ռուսների սպանել։

Իրավապահ մարմիններից ՏԱՍՍ գործակալությանը փոխանցել են, որ ուկրաինացի դիվանագետի նկատմամբ դաշնային և միջազգային հետախուզում է հայտարարվել։

Հիշեցնենք, որ Վրուբլևսկու քրեական հետապնդման պատճառը 2022-ին տեղական բլոգեր Դիաս Կուզաիրովին տված հարցազրույցն է։ Այն ժամանակ Ղազախստանում Ուկրաինայի դեսպանը, խոսելով իր երկրում լայնածավալ պատերազմի մասին, մասնավորապես, նշել է․ - «Մենք փորձում ենք հնարավորինս շատ նրանց սպանել։ Հիմա ինչքան շատ ռուս սպանենք, այնքան մեր երեխաներն ավելի քիչ կսպանեն»:

Ղազախստանի արտգործնախարարությունը հայտարարել է, որ իրենք զրույց են ունեցել Վրուբլևսկու հետ, որից հետո նա ներողություն է խնդրել։ Ռուսական կողմը պահանջել է դիվանագետին վտարել Ղազախստանից, Աստանան էլ արձագանքել է՝ նա արձակուրդ է գնալու։ Ղազախստանի արտգործնախարարությունը ավելի ուշ հաղորդեց, որ Վրուբլևսկին կլքի իր պաշտոնը, սակայն «ոչ ոք չի արգելել և չի արգելի նրա ելքը երկրից»։

Նշենք, որ Ուկրաինայի նախագահ Վլադիմիր Զելենսկին Վրուբլևսկուն պաշտոնանկ արեց 2022-ի հոկտեմբերին, երբ Մոսկվան հետաքննություն սկսեց։