Ռուսաստանում կարող է արգելափակվել «Wikipedia»–ն

Ռուսաստանում «Wikipedia»–ն կարող է արգելափակվել VPN-ների մասսայականացումն արգելող օրենքով, ասում է Պետդումայի տեղեկատվական քաղաքականության հանձնաժողովի փոխնախագահ Անտոն Գորելկինը։ Իր Telegram-ի ալիքում նա նշել է, որ դրա համար անհրաժեշտ տեխնիկական լուծումն արդեն մշակվում է Ինտերնետ տեխնոլոգիաների տարածաշրջանային հանրային կենտրոնի (ROCIT) մասնագետների կողմից։ Այս մասին գրում է RTVI–ը:

Պատգամավորը նշում է, որ «Վիքիպեդիայում» կա հոդված, որտեղ խոսվում է VPN ծառայության բլոկները շրջանցելու ուղիների մասին, ինչպես նաև «խիստ» խորհուրդ է տալիս օգտատերերին օգտագործել դրանք։ Միևնույն ժամանակ, ըստ պատգամավորի, «Ռոսկոմնադզորը» նախկինում «մի շարք պահանջներ» ուներ «Վիքիպեդիայի» դեմ, որոնցից շատերն արդեն ստացել են դատարանի որոշումներ։

««Վիքիպեդիան» արգելափակելու իրավական հիմքեր կան, մնում է միայն ապահովել, որ դա օգտատերերի մոտ լուրջ անհանգստություն չառաջացնի»,- կարծում է Գորելկինը։

Նա հավելեց, որ «Վիքիպեդիայից» ստացված ողջ «արժեքավոր տեղեկատվությունը» արդեն կրկնօրինակվել է այլ ռեսուրսներում՝ БРЭ պորտալում, «Рувики» և «Руниверсалисе» հարթակներում: «Մնում է միայն համոզվել, որ Վիքիպեդիայի հոդվածի հղումից հետո օգտատերից պահանջվում է բացել դրա անվտանգ տարբերակը իր ռուսական անալոգներից մեկում»,- եզրափակեց պատգամավորը:

Մարտի 1-ից Ռուսաստանում ուժի մեջ է մտել արգելափակման շրջանցման միջոցների գովազդի կամ մասսայականացման արգելքը, որը ներառում է VPN ծառայությունները։ «Ռոսկոմնադզորի» կարգադրությունը կգործի մինչև 2029 թվականի սեպտեմբերի 1-ը։ Փորձագետները բացատրել են, որ նման լուծումը չի փոխի իրավիճակը օգտատերերի համար: Մասնավորապես, Telecom Daily տեղեկատվական և վերլուծական գործակալության գործադիր տնօրեն Դենիս Կուսկովն ասել է, որ VPN ծառայություններից օգտվողների թիվը կարող է նվազել միայն «հավելվածների խանութներից ծառայությունները հեռացնելու կամ արգելափակելու միջոցով»։