ՀԱՄԱՍ-ը՝ Իսրայելի հետ 1 օրվա ընթացքում հրադադարի հնարավոր ձեռքբերման մասին

«Եթե Իսրայելը համաձայնի ՀԱՄԱՍ-ի պահանջներին, որոնք ներառում են տեղահանված պաղեստինցիների վերադարձը Գազայի հյուսիսային հատված եւ մարդասիրական օգնության ծավալների ավելացումը, դա ճանապարհ կհարթի հրադադարի համաձայնագրի համար առաջիկա 24-48 ժամվա ընթացքում», - AFP-ին հայտնել է շարժման ներկայացուցիչը:

Վերջին ժամանակավոր հրադադարը Գազայում գործել է 2023 թվականի նոյեմբերի 24-ի առավոտից մինչև դեկտեմբերի 1-ի առավոտ։ Այս ընթացքում կողմերը փոխանակել են ավելի քան 100 իսրայելցի պատանդների 200 պաղեստինցի բանտարկյալների հետ, հիմնականում կանայք և երեխաներ:

Փետրվարի վերջին ԱՄՆ նախագահի ազգային անվտանգության հարցերով խորհրդական Ջեյք Սալիվանը հայտնել էր, որ հրադադարի մասին համաձայնությունը ձեռք կբերվի «առաջիկա օրերին»: Նա հրաժարվել է բացահայտել համաձայնագրի մանրամասները, սակայն նշել է, որ երկու կողմերի բանակցողներն արդեն համաձայնել են դրա «հիմնական ուրվագծերի» հետ: Այն մասին, որ Գազայում հրադադարը կհաստատվի «մի քանի օրից», հայտնել են նաև Եգիպտոսի իշխանությունները:

Ավելի վաղ, ԱՄՆ նախագահ Ջո Բայդենի աշխատակազմի բարձրաստիճան ներկայացուցիչը հայտարարել էր, որ իսրայելական կողմը «հիմնականում ընդունել է» Գազայի հատվածում պաղեստինյան ՀԱՄԱՍ իսլամիստական խմբավորման հետ վեցշաբաթյա զինադադարի առաջարկը: Համաձայնության հասնելու համար Թել Ավիվը ցանկանում է պատանդների ցուցակ ստանալ, ճշտել Է Reuters-ը: