Շոլցը` Ղրիմի կամրջի վրա Taurus հրթիռների հնարավոր կիրառման վերաբերյալ սպաների խոսակցության մասին

Գերմանիայի կանցլեր Օլաֆ Շոլցը խոստացել է արագ հետաքննել իրավիճակը ռուսական ԶԼՄ-ներում հայտնված գերմանացի բարձրաստիճան զինվորականների զրույցի ձայնագրության շուրջ, որը վերաբերում է Ղրիմի կամրջի վրա Taurus հրթիռների հնարավոր կիրառմանը:

Կատարվածը կանցլերն անվանել է «շատ լուրջ խնդիր»։

«Այդ պատճառով հիմա դա պարզվում է շատ մանրակրկիտ, շատ ինտենսիվ և շատ արագ։ Դա նույնպես անհրաժեշտ է», - ասել է Շոլցը Վատիկան կատարած այցի ընթացքում:

Գերմանական հակահետախուզությունը ստուգում է Ղրիմի կամրջի վրա «Taurus» հրթիռների հնարավոր կիրառման մասին բունդեսվերի սպաների խոսակցության հնարավոր գաղտնալսումը։ 

Հիշեցնենք` «Ռոսիա Սեգոդնյա» ՄՏԳ–ի և RT–ի գլխավոր խմբագիր Մարգարիտա Սիմոնյանը հրապարակել էր գերմանացի սպաների խոսակցության տեքստի սղագրությունը։ Այդ խոսակցության ընթացքում նրանք քննարկում են Ղրիմի կամրջի վրա հարձակվելու հնարավորությունը։ Սիմոնյանը նշել էր, որ 40-րոպեանոց ձայնագրության մեջ կարելի է լսել նաև հակամարտությանը բրիտանացիների և ֆրանսիացիների վաղեմի մասնակցությունը հաստատող խոսքեր։

Զրույցը, որի ընթացքում բունդեսվերի ներկայացուցիչները խոսում են Ղրիմի կամրջին հասցվելիք հարվածների մասին, կայացել է փետրվարի 19-ին։ Թեման քննարկել են ՌՕՈւ հրամանատարության գործողությունների և զորավարժությունների բաժնի ղեկավար Գրեգեն, ՌՕՈւ տեսուչ Գերհարտցը (լուսանկար) և օդային գործողությունների կենտրոնի աշխատակիցներ Ֆենսկեն և Ֆրոշտեդտեն։

Միևնույն ժամանակ սպաներից մեկը հիշատակել է փետրվարի 21-ին Ուկրաինա ծրագրվող այցի մասին` համակարգելու համար ռուսական օբյեկտներին հասցվող հարվածները։ Բացի այդ, բունդեսվերը հնարավոր է համարել Կիևին «Taurus» տեսակի 100 հրթիռ փոխանցելը, որոնք պատրաստ կլինեն կիրառման համար 8 ամսից։