ԱՄՆ նախկին նախագահ Դոնալդ Թրամփը վիճարկել է քաղաքացիական խարդախության գործով դատարանի որոշումը, որով նա պարտավորվել է վճարել մոտ 464 միլիոն դոլար։ Թրամփի փաստաբանները խնդրել են ստուգել՝ արդյոք գործով դատավորը սխալ է թույլ տվել, չարաշահել է իր հայեցողությունը կամ գործել է իր իրավասությունից դուրս։

Ավելի վաղ՝ փետրվարին, Նյու Յորքի դատարանը նախկին նախագահին պարտավորեցրել էր վճարել 355 միլիոն դոլարի չափով տուգանք և ավելի քան 100 միլիոն դոլարի տոկոսներ։ Դատարանը նաև նրան երեք տարով արգելել է զբաղեցնել տնօրենի կամ այլ ղեկավար պաշտոն Նյու Յորքում գրանցված որևէ կորպորացիայում:

Դատախազներն ասել են, որ Թրամփը և նրա համախոհները՝ Trump Organization-ի նախկին ղեկավարները, կեղծել են ֆինանսական հաշվետվություններ՝ վարկերի և ապահովագրության ավելի լավ պայմաններ ստանալու համար: Արդյունքում Թրամփը «կեղծ կերպով ուռճացրեց իր կարողությունը միլիարդավոր դոլարներով՝ անարդարացիորեն հարստանալու և համակարգը խաբելու համար, և դրանով իսկ խաբեց բոլորին»։