ՏԵՍԱՆՅՈՒԹ․ ՆԳ նախարարը՝ հայի սպանության մեջ մեղադրվող ադրբեջանցուն Բաքվին փոխանցելու մասին

Ես չեմ կարող այդ հարցին պատասխանել, քանի դեռ մենք մեր գործառույթները լրիվ իրավաչափ իրականացրել ենք, հարցում են արել, պատասխանել ենք եւ չենք ուշացրել: Այս մասին այսօր ԱԺ-ում լրագրողների հետ զրույցում նշեց ՆԳ նախարար Վահե Ղազարյանը՝ անդրադառնալով հայի սպանության մեջ մեղադրվող եւ միջազգային հետախուզման մեջ գտնվող ադրբեջանցուն մի քանի ժամվա ընթացքում Բաքվին փոխանցելուն:

«Դա ընթացակարգ է, որից մենք չենք շեղվել: Եթե իրենք հանցագործին բռնում են, մեզ հարցում են անում, մենք էլ պատասխանում ենք, թե իրականում նա մեր կողմից հետախուզվում է, թե ոչ: Բոլոր անձնաց վերաբերյալ, որոնց նկատմամբ հայտարարված է միջազգային հետախուզում, պարտավոր ենք այդ հարցմանը պատասխանել: Նույնն էլ իրենք: Մենք նույն օրը ստացել ենք, անմիջապես էլ պատասխանել ենք»,-ասաց նա՝ չպատասխանելով հարցին, թե այն պահին, երբ իրենք պատասխան էին ուղարկում ՌԴ, ադրբեջանցին արդեն ազա՞տ էր արձակվել, թե ոչ:

«Մենք նմանատիպ հետախուզվողներ էլի ունենք, որ բռնել են, բաց են թողել, երեւի դուք էլ եք տեղյակ: Դե դա ռուսական կողմը պետք է պատասխանի»,-նշեց նախարարը: