Գարիկ Գալեյանը շարունակում է մնալ վերակենդանացման բաժանմունքում. MediaHub

Գարիկ Գալեյանը շարունակում է մնալ վերակենդանացման բաժանմունքում: Այս մասին MediaHub-ին հայտնել է նրա կինը՝ Աստղ Գալեյանը:

Նրա խոսքով, Գալեյանը միացված է հատուկ սարքավորումներին, արվում է ամեն անհրաժեշտը, որպեսզի վիճակը թեթևանա ու կայունանա:

«Վաղը առավոտյան հավանական է կոնսիլիում կլինի, բժիշկները կորոշեն՝ ինչ պետք է անեն»,- ասել է նա՝ ավելացնելով, որ վաղը առավոտյան պարզ կլինի՝ հնարավոր է արդեն սիրտը ստենտավորել, թե դեռ առողջական վիճակը թույլ չի տալիս:

Հիշեցնենք, երեկ հայտնի դարձավ, որ 44-օրյա պատերազմում զոհված զինծառայող Մխիթար Գալեյանի հայրը տեղափոխվել է հիվանդանոց։ Այս մասին իր ֆեյսբուքյան էջում հայտնել էր նրա փաստաբան Վահան Հովհաննիսյանը։

«Վերջին դատական նիստով Գարիկ Գալեյանի խափանման միջոցի ժամկետը երկարաձգելուց և դրանով իսկ նրան Եռաբլուր զինվորական պանթեոն այցելելն արգելելուց հետո, Գարիկ Գալեյանի առողջական վիճակը կտրուկ վատացել է:

Երեկ առավոտյան, «ինֆարկտ» նախնական ախտորոշմամբ՝ Գալեյանը տեղափոխվել է «Աստղիկ» ԲԿ և ներկայումս գտնվում է վերակենդանացման բաժանմունքում:

Առողջական վիճակն այն աստիճան ծանր է, որ առժամանակ հնարավոր չէ վիրահատական միջամտություն կատարելը»,- գրել է նա։