Ֆրանսիայի պաշտպանության նախարարը պատմության մեջ առաջին անգամ կայցելի Հայաստան
Ֆրանսիայի պաշտպանության նախարար Սեբաստիան Լեկորնյուն առաջիկայում կայցելի Հայաստան: Նա այդ մասին ասել է RTL ռադիոկայանի եթերում։
«Առաջիկայում Հայաստան կմեկնեմ խորհրդարանականների և տնտեսվարողների մեծ պատվիրակության հետ։ Պատմության մեջ առաջին անգամ է, որ Ֆրանսիայի պաշտպանության նախարարը մեկնում է Հայաստան»,– ասել է նա։
Նրա խոսքով` «Հայաստանը կանգնած է անվտանգության լուրջ մարտահրավերների առջև, ներառյալ ինքնիշխանության և սահմանների պաշտպանության հարցերը, որոնք կապված են Ադրբեջանի սպառնալիքների հետ»:
«Մեր պատասխանատվությունն է օգնել Հայաստանին, հատկապես մեծացնել նրա պաշտպանական ներուժը։ Այդ պատճառով Ֆրանսիան ռազմական տեխնիկա է մատակարարում Հայաստանին՝ բարեկամ երկրին, զուտ պաշտպանական նպատակով»,– նշել է երկրի Պաշտպանության նախարարը:
Նրա խոսքով՝ խոսքը «երկիր–օդ տիպի» պաշտպանական միջոցների և զրահամեքենաների մասին է:
