Ուրսուլա ֆոն դեր Լայենն առաջադրվել է Եվրահանձնաժողովի նախագահի պաշտոնում վերընտրվելու համար
Եվրահանձնաժողովի նախագահ Ուրսուլա ֆոն դեր Լայենը պաշտոնապես առաջադրվել է իր պաշտոնում երկրորդ ժամկետով վերընտրվելու համար։ Այս մասին հայտնում են եվրոպական լրատվամիջոցները:
«Ամիսներ տևած լռությունից հետո երկուշաբթի օրը Բեռլինում CDU կուսակցության նիստից հետո գերմանացի նախկին նախարարը հայտարարել է իր մտադրությունների մասին»,- գրում է ֆրանսիական Le Figaro թերթը:
65-ամյա քաղաքական գործիչն առաջադրվել է իր՝ Գերմանիայի «Քրիստոնեական-դեմոկրատական միություն» կուսակցության կողմից։
Կուսակցության ղեկավար Ֆրիդրիխ Մերցը հայտարարել է, որ «Գերմանիայի քրիստոնեական-դեմոկրատական միություն»-ը «միաձայն ընտրել է Ուրսուլա ֆոն դեր Լայենին», որպեսզի նա մնա իր պաշտոնին։
Ընդունելով իր առաջադրումը՝ ֆոն դեր Լայենն ասել է․ «Աշխարհն այժմ լիովին տարբեր է հինգ տարի առաջվա համեմատությամբ»։
Հիշեցնենք` Ուրսուլա ֆոն դեր Լայենը Եվրահանձնաժողովի նախագահի պաշտոնը ստանձնել է 5 տարի առաջ:
