Ինչ վերաբերում է ՌԴ-ին մեղադրելու փորձերին, ապա դրանք անհեթեթ են․ Զախարովա

Եվրամիության ժողովրդավարական գործընթացներին միջամտելու մեջ ՌԴ-ին մեղադրելու հերթական փորձերն անհեթեթ են։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։ Տեղեկությունը փոխանցում է gazeta.ru-ն։

Այսպես է նա մեկնաբանել Եվրախորհրդարանի կողմից փետրվարի 8-ին ընդունված հակառուսական բանաձևը, որում ՌԴ-ին մեղադրել են «ԵՄ-ում ժողովրդավարական գործընթացներին» միջամտելու մեջ:

«Ինչ վերաբերում է Ռուսաստանին մեղադրելու փորձերին, ապա դրանք ըստ սահմանման անհեթեթ են»,- նշել Է դիվանագետը:

Զախարովան ուշադրություն է հրավիրել ԵՄ-ում «ժողովրդավարական նորմերի և իդեալների» բացակայության վրա։ Նրա խոսքով՝ եվրոպացի քաղաքական գործիչները ոտնահարել են հասարակ մարդկանց իրավունքների պաշտպանության, օրենքի գերակայության և տարատեսակ չարաշահումների դեմ պայքարի սկզբունքները:

Դիվանագետն ընդգծել է, որ Եվրոպայում այժմ աջակցում են նեոնացիզմին եւ ջանասիրաբար չեն նկատում ազգային փոքրամասնությունների նվաստացուցիչ վիճակը:

Նախօրեին Զախարովան հայտարարել էր, որ Գերմանիայի կանցլեր Օլաֆ Շոլցը «չհնազանդվել է ԱՄՆ-ի հրամանին» և դիտել է Ռուսաստանի նախագահ Վլադիմիր Պուտինի հարցազրույցը ամերիկացի լրագրող Թաքեր Կարլսոնին: