ՀՀ–ն ականապատ դաշտերի մասին տեղեկամատյաններ է փոխանցել Ադրբեջանին. ԶԼՄ

Հայաստանն Ադրբեջանին է փոխանցել Լեռնային Ղարաբաղում ականապատ դաշտերի մասին տեղեկություններով 8 նոր տեղեկամատյան։ Այս մասին հայտնում են ադրբեջանական լրատվամիջոցները:

Ըստ նույն աղբյուրների` ներկայացված տեղեկամատյանները հիմնականում բաղկացած են Քարվաճառի շրջանի Մռավի լեռնաշղթան շրջապատող ականապատ դաշտերի մասին գրառումներից։

Հունվարի 25-ին ՀՀ ԱԱԾ–ն տեղեկացրել էր, որ ԼՂ–ի տարածքում գտնվող ականապատ դաշտերի մասին 8 նոր տեղեկամատյաններն առաջիկայում աշխատանքային խողովակներով կփոխանցվեն ադրբեջանական կողմին։ Նշվում էր, որ դրանց կրկնօրինակները կփոխանցվեն միջազգային գործընկերներին:

Ըստ ԱԱԾ–ի` 8 նոր տեղեկամատյանները հայտնաբերվել են ԼՂ նախկին զինծառայողների շրջանում հարցումային աշխատանքների շնորհիվ, որոնք վերսկսել են այն բանից հետո, երբ ադրբեջանական լրատվամիջոցները հայտնել են ականի պայթյունից քաղաքացիների մարմնական վնասվածքներ ստանալու մի քանի դեպքի մասին։