ՏԵՍԱՆՅՈՒԹ. Գերմանիայում հասարակական տրանսպորտի աշխատակիցների գործադուլ է. երկիրը կաթվածահար վիճակում է
Գերմանիայում տրանսպորտի աշխատողների համընդհանուր գործադուլ է՝ երկիրը կաթվածահար վիճակում է: Հայտնում են տեղի լրատվամիջոցները:
Գերմանիայում հասարակական տրանսպորտի շուրջ 90 հազար աշխատակիցներ գործադուլ են հայտարարել։ DPA գործակալության տվյալներով՝ ավտոբուսների, տրամվայի ու մետրոյի տեղաշարժը սահմանափակված է 80 քաղաքներում։
«Վերդի» արհմիությունը գործադուլի կոչ է արել։ Ասոցիացիան պահանջում է բարելավել աշխատանքային պայմանները և բարձրացնել 130 տրանսպորտային ձեռնարկությունների աշխատակիցների աշխատավարձերը։ Գործադուլներ չկան միայն մեկ դաշնային նահանգում՝ Բավարիայում։ Բեռլինում գործադուլը կտևի ընդամենը մի քանի ժամ:
Սա Վերդիի կողմից այս շաբաթ հրավիրված երկրորդ լայնածավալ բողոքի ակցիան է։ Նախօրեին օդանավակայանի անվտանգության աշխատակիցները դադարեցրել են աշխատանքը՝ չեղարկվել է ավելի քան 1 հազար չվերթ, գործադուլը խաթարել է 200 հազար ուղեւորների պլանները։
Ֆրանկֆուրտի օդանավակայանը, որը Գերմանիայում ամենամեծն է, հայտնել է, որ իր հարակից տարածքում երթևեկությունը խափանվել է ֆերմերների բողոքի պատճառով:
Գերմանիայում օդանավերի չվերթերը զգալիորեն խաթարվել են նաև օդանավակայանի անվտանգության աշխատակիցների գործադուլի պատճառով։ Կիրակի և երկուշաբթի օրերին գերմանական Lufthansa խոշորագույն ավիափոխադրողի դուստր ձեռնարկության՝ Discover Airlines-ի օդաչուները նույնպես կմիանան գործադուլին։
«Ֆերմերների բողոքի պատճառով Ֆրանկֆուրտի օդանավակայանի տարածքում առաջացել են երթևեկության լուրջ խափանումներ, հետևաբար ուղևորներին խնդրում ենք երթևեկել հասարակական տրանսպորտով»,- ասված է Ֆրանկֆուրտի օդանավակայանի հայտարարության մեջ։
