Պեսկովն արձագանքել է ռուսներին հավաքագրելու ԿՀՎ-ի փորձերին
Կրեմլը տեսել է սոցցանցերում հրապարակված տեսանյութ, որում ռուսներին կոչ է արվում համագործակցել Կենտրոնական հետախուզական վարչության հետ։ Այս մասին ճեպազրույցի ժամանակ հայտարարել է ՌԴ նախագահի մամուլի քարտուղար Դմիտրի Պեսկովը։
Նա ընդգծել է, որ տարբեր երկրների հետախուզական ծառայությունները հաճախ են դիմում սոցցանցերի օգտագործմանը, սակայն սխալվել են՝ տեսանյութը տեղադրելով X-ում (նախկինում՝ Twitter):
«Աշխարհի հետախուզական ծառայությունները հաճախ են դիմում սոցիալական ցանցերին։ ԿՀՎ-ն դա անում է ամեն տարի: Բայց ինչ-որ մեկը պետք է ԿՀՎ-ին ասի, որ VKontakte-ն այստեղ ավելի հայտնի է, քան արգելված X-ը»,- ասել է Պեսկովը:
Պեսկովը մի շարք այլ հայտարարություններ է արել. Նա մեկնաբանել է մամուլում հայտնված տեղեկությունը ՌԴ պետության ղեկավար Վլադիմիր Պուտինի՝ Թուրքիա կատարելիք այցի մասին։ Կրեմլի ներկայացուցիչը նշել է, որ շփումներն ընթանում են ամենաբարձր մակարդակով, սակայն պետք է սպասել պաշտոնական տեղեկատվության։
