«Մեզ այնտեղ չեն հրավիրում». Լավրովը` հայ-ադրբեջանական սահմանի սահմանազատման մասին
Մոսկվան ներգրավված չէ հայ-ադրբեջանական սահմանի սահմանազատման հանձնաժողովների աշխատանքներին, չնայած պայմանավորվածությանը։ Այս մասին 2023 թվականին ՌԴ դիվանագիտության արդյունքների ամփոփմանը նվիրված ասուլիսի ժամանակ հայտարարել է ՌԴ ԱԳ նախարար Սերգեյ Լավրովը։
«Մենք առաջարկել ենք մեր ծառայությունները, ավելին, կողմերը համաձայնագիր են ստորագրել, որ սահմանազատման հանձնաժողով են ստեղծում, որին ռուսական կողմը կմասնակցի որպես խորհրդատու։ Մեզ այնտեղ չեն հրավիրում»,- ասել է Լավրովը։
Նա ներկաների ուշադրությունն է հրավիրել այն հանգամանքի վրա, որ Եվրոպական խորհրդի ղեկավար Շառլ Միշելը հայտարարել է, որ դելիմիտացիայով զբաղվելու է Եվրամիությունը, չնայած որ ոչ Հայաստանը, ոչ էլ Ադրբեջանը երբեք ԵՄ մաս չեն կազմել:
Նա ընդգծել է, որ Եվրամիությունը ոչ մի քարտեզ չունի։ Ռուսաստանի Դաշնությունն ունի քարտեզներ, և դա ձեռնտու է կողմերին, բայց ոչ ԵՄ-ին և ԱՄՆ-ին, որոնք նույնպես ցանկանում են մասնակցել սահմանազատմանը։
ՌԴ–ն երբեք Հայաստանի հետ հարաբերությունների սառեցման նախաձեռնող չի եղել. Լավրով
«Նրանց մոտ ինչ-որ կերպ հայտնվել են ԽՍՀՄ Գլխավոր շտաբի քարտեզներ, և դրա համար ասում են «ձեզ ռուսներ պետք չեն, մենք քարտեզներ ունենք»: Մի փոքր տարօրինակ է թվում, մեծ մարդիկ են, բայց խաղ են խաղում, թե «ով է գլխավորը», և ով կարող է լրացուցիչ միավորներ հավաքել միջազգային ասպարեզում»,- ասել է ՌԴ ԱԳՆ ղեկավարը։
Նրա խոսքով, ցավալի է, որ արևմտյան եսասիրական շահերը խանգարում են և՛ Հայաստանի, և՛ Ադրբեջանի հիմնարար շահերի իրականացմանը։
