Էլեկտրական մեքենաներ արտադրող Tesla ընկերությունը պլանավորում է երկու շաբաթով դադարեցնել արտադրությունը Բեռլինի գործարանում՝ Կարմիր ծովով բեռների առաքման հետ կապված խնդիրների պատճառով: Այս մասին Interfax-ի փոխանցմամբ` գրում է The Wall Street Journal-ը։

Tesla-ն հայտարարել է, որ հունվարի 29-ից գրեթե ամբողջությամբ կդադարեցնի արտադրությունը Բեռլինի մերձակայքում գտնվող հսկայական գործարանում՝ բաղադրիչների պակասի պատճառով: Արտադրությունը նախատեսվում է վերսկսել փետրվարի 12-ին։

«Տրանսպորտի ժամանակի զգալի աճը բաց է ստեղծում մատակարարման շղթաներում: Բաղադրիչների պակասի պատճառով մենք ստիպված ենք դադարեցնել մեքենաների արտադրությունը Բեռլինի գործարանում», - ասվում է հայտարարության մեջ:

Տրանսպորտային ընկերությունները, Եմենի հութիների կողմից Կարմիր ծովում առևտրային նավերի վրա հարձակումների պատճառով, ստիպված են եղել լուծումներ փնտրել, ինչը հանգեցրել է բեռների առաքման ժամանակի զգալի աճի: