Լաստանավային հաղորդակցությունը բավարար հետաքրքրություն չի առաջացրել. Էկոնոմիկայի նախարար

Ծովային փոխադրումներն իրականացվել են մի քանի ամիս, սակայն դրանք բավարար ուշադրություն չի գրավել արտահանողների և ներմուծողների կողմից։ Այս մասին հունվարի 8-ին լրագրողների հետ հանդիպման ժամանակ ասել է Հայաստանի էկոնոմիկայի նախարար Վահան Քերոբյանը։

Քերոբյանը հայտարարել է, թե լաստանավային հաղորդակցությունը, որ պետք է այլընտրանք լիներ Լարսի անցակետին և թույլ տար բեռնափոխադրում իրականացնել դեպի Ռուսաստան, գործարկվել է, սակայն մի քանի ամիս աշխատելուց հետո դադարեցվել։ Ըստ նրա, լաստանավային հաղորդակցությունը արտահանողների և ներմուծողների համար բավարար հետաքրքրություն չի առաջացրել:

«Մեր գնահատմամբ՝ այն չի առաջացրել բավարար հետաքրքրություն արտահանողների և ներմուծողների մոտ: Եվ մենք չենք տեսել, որ արտահանող և ներմուծող ընկերություններն օգտագործում են այդ լաստանավն այնպես, որ մենք ինքներս մեզ և մեր գործընկերներին համոզենք այդ ծրագիրը շարունակելու վերաբերյալ»,- նշել է նա՝ հավելելով, որ հիմնական ջանքերը պետք է ուղղել այլ երկրներ արտահանումն ակտիվացնելու ուղղությամբ։

Ըստ նրա, գլխավոր ուղղությունը լինելու է մերձավորարևելյան ուղղությունը, Ծոցի երկրները, կարևոր են նաև ասիական, եվրոպական, ամերիկյան ուղղությունները։

Նա նաև հավելել է, որ ՀՀ իշխանությունները հույս ունեն մինչև 2024 թվականի ավարտը օպերատոր ընտրել «չոր նավահանգիստ» նախագծի և Գյումրիում ինդուստրիալ պարկ կառուցելու համար։ 

««Չոր նավահանգստի» նախագիծը տնտեսապես դրական արդյունք կապահովի։ Դրա տեխնիկատնտեսական հիմնավորումը ստացել է դրական գնահատական, և այն կներկայացվի Հանրային ներդրումային կոմիտե»,- ասաց Քերոբյանը։

Նախագծի հաստատումից հետո կսկսվի պետություն-մասնավոր ընկերություն համաձայնագրի նախապատրաստման փուլը, մրցույթի հայտարարությունը և մի շարք այլ միջոցառումներ: