Թուրքիան որոշել է F-16 ինքնաթիռների շարժիչներ արտադրել և տեղադրել իր կործանիչներում

Թուրքիան նախատեսում է ԱՄՆ-ի հետ համատեղ շարժիչներ արտադրել F-16 կործանիչների համար, որպեսզի դրանք օգտագործի իր ինքնաթիռներում։ Այս մասին հայտնում է ՌԻԱ Նովոստին՝ հղում անելով արևմտյան ԶԼՄ-ներին:

Նշվում է, որ Թուրքիան ցանկանում է շարժիչների մատակարարումներ ապահովել թուրքական հինգերորդ սերնդի TAI KAAN մարտական ինքնաթիռի շահագործման սկզբնական փուլի համար:

«Թուրքիան ԱՄՆ-ից թույլտվություն է խնդրել F-16 ինքնաթիռներում օգտագործվող GE Aerospace շարժիչների համատեղ արտադրության համար՝ դրանք սեփական կործանիչների վրա կիրառելու նպատակով», - ասվում է հոդվածում:

Անկարան ուզում է F110 շարժիչները KAAN ինքնաթիռներում օգտագործել այնքան ժամանակ, քանի դեռ սեփական արտադրության շարժիչներ չի մշակել:

Նշվում է, որ KAAN ինքնաթիռի առաջին թռիչքը նախատեսված է 2024 թվականի հունվարին։

Հիշեցնենք՝ ավելի վաղ Թուրքիայի ազգային պաշտպանության նախարար Յաշար Գյուլերը հայտարարել էր, որ KAAN մարտական ինքնաթիռը բանակի սպառազինության մեջ կմտնի 2032 թվականից ոչ ուշ: