Պեսկովը մեկնաբանել է Փաշինյան-Ալիև զրույցը

ՌԴ նախագահի մամուլի քարտուղար Դմիտրի Պեսկովը մեկնաբանել է Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի զրույցը Սանկտ Պետերբուրգում ԱՊՀ ոչ պաշտոնական գագաթնաժողովի շրջանակներում։

Նա նշեց, որ Ալիևն ու Փաշինյանը Սանկտ Պետերբուրգում ոչ թե լիարժեք բանակցություններ են վարել, այլ «ոտքի վրա» շփվելու հնարավորություն են ունեցել։

«Բոլորը հնարավորություն ունեցան շփվելու «ոտքի վրա»։ Երկրները գնում են դեպի համաձայնագրի վերջնականացումը՝ առանց որակի զիջման։ Մենք բոլորի հետ միասին սպասում ենք աշխատանքների ավարտին»,- ասել է Պեսկովը։

Նրա խոսքով՝ ռուսական կողմը աջակցում է նման աշխատանքներին։

«Մենք կարծում ենք, որ համաձայնագրի կնքումը օգտակար կլինի երկու երկրների և ողջ տարածաշրջանում խաղաղության կայունացման համար»,- հավելել է Կրեմլի խոսնակը։

Նախօրեին հաղորդվել էր, որ Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը Սանկտ Պետերբուրգում ԱՊՀ ոչ պաշտոնական գագաթնաժողովի շրջանակում քննարկել են հայ-ադրբեջանական խաղաղության օրակարգին վերաբերող հարցեր։ Դեկտեմբերի 25-ին հաղորդվեց, որ Ադրբեջանը Հայաստանին է հանձնել խաղաղության պայմանագրի նորացված տարբերակը։