ԱՄՆ պաշտոնյաները կողմ են քվեարկել Բայդենի պաշտոնանկությանը
ԱՄՆ նախագահ Ջո Բայդենը մեղադրել է Ներկայացուցիչների պալատի հանրապետականներին, որոնք բանաձև են ընդունել իր դեմ հետաքննությունը շարունակելու մասին, «իրական խնդիրները» լուծելու ցանկություն չունենալու համար:
«Ես ամեն օր արթնանում եմ՝ կենտրոնացած ամերիկյան ժողովրդի առջև ծառացած խնդիրների վրա։ Իրական խնդիրներ, որոնք ազդում են նրանց կյանքի, ինչպես նաև մեր երկրի և աշխարհի ուժի և անվտանգության վրա: Ցավոք, Ներկայացուցիչների պալատի հանրապետականները չեն միանում ինձ»,- ասվում է Բայդենի Սպիտակ տան տարածած հայտարարության մեջ։
«Ինչ-որ բան անելու փոխարեն, որպեսզի օգնի ամերիկացիների կյանքն ավելի լավը դարձնել, նրանք կենտրոնանում են ստի միջոցով իմ նկատմամբ հարձակումների վրա»,- նշել է նա:
ԱՄՆ-ի ղեկավարն ընդգծել է, որ այնպիսի հրատապ հարցերի լուծման փոխարեն, ինչպիսիք են Ուկրաինային, Իսրայելին օգնությունն ու հարավային սահմանին տիրող իրավիճակը, Հանրապետական կուսակցության անդամները «նախընտրում են ժամանակ ծախսել անհիմն քաղաքական հնարքի վրա, որը, ինչպես խոստովանում են անգամ Կոնգրեսում հանրապետականները, հիմնավորված չէ փաստերով»:
Ավելի վաղ ԱՄՆ Կոնգրեսի Ներկայացուցիչների պալատի անդամները հավանություն էին տվել իմպիչմենտի գործընթացի շրջանակներում նախագահի նկատմամբ հետաքննությունը շարունակելու բանաձևին:
Բանաձևը, որը ներկայացվել է Կոնգրեսի ստորին պալատի հանրապետական խմբակցության քննարկմանը, հանձնարարում է Ներկայացուցիչների պալատի վերահսկողության և հաշվետվողականության, եկամուտների և ծախսերի կոմիտեներին և իրավաբանական կոմիտեին շարունակել իրենց ընթացիկ վարույթները՝ որպես հետաքննության մաս, թե արդյոք բավարար հիմքեր կան ԱՄՆ ներկայիս նախագահի իմպիչմենտի համար:
Հետաքննության շարունակմանն աջակցել են Ներկայացուցիչների պալատի բոլոր հանրապետական օրենսդիրները՝ 221 մարդ: Կոնգրեսի ստորին պալատի՝ դեմոկրատական կուսակցության բոլոր 212 անդամները դեմ են քվեարկել բանաձևի ընդունմանը:
