Պուտինը՝ Փաշինյանի՝ ՀԱՊԿ միջոցառումներին չմասնակցելու մասին
Ռուսաստանի նախագահ Վլադիմիր Պուտինը հայտարարել է, որ որքան ինքն է տեղյակ, ՀՀ վարչապետ Նիկոլ Փաշինյանի բացակայությունն ընդհանուր միջոցառումներին կապված է ոչ թե ՀԱՊԿ, ԱՊՀ, ԵԱՏՄ կազմակերպություններում իր աշխատանքը շարունակելու ցանկության կամ չցանկանալու հետ, այլ երկրի ներքին գործընթացների հետ: Տեղեկությունը փոխանցում է ՌԻԱ Նովոստին։
«Ինչ վերաբերում է ընդհանուր միջոցառումներին Հայաստանի վարչապետի բացակայությանը, մենք գիտենք, որ դա կապված է, ամեն դեպքում, ինչպես գիտենք, Հայաստանում որոշ գործընթացների հետ և կապված չէ այդ ինտեգրացիոն միավորումներում աշխատանքը շարունակելու ցանկության կամ չցանկանալու հետ։ Տեսնենք, թե ինչպես կզարգանա իրավիճակը»,-ասել Է Պուտինը՝ ամփոփելով տարին:
Պուտինը չի կարծում, որ Հայաստանին ձեռնտու կլիներ հեռանալ Անկախ պետությունների համագործակցությունից (ԱՊՀ), Հավաքական անվտանգության պայմանագրի կազմակերպությունից (ՀԱՊԿ) և Եվրասիական տնտեսական միությունից:
«Չեմ կարծում, որ Հայաստանի շահերից է բխում որևէ կերպ դադարեցնել իր անդամակցությունը ԱՊՀ-ին, ԵԱՏՄ-ին, ՀԱՊԿ-ին։ Ի վերջո, դա միևնույն է պետության ընտրությունն է»,- ասել Է նա։
