Ադրբեջանում նախագահն ընտրվում է ցմահ․ Ալիևը՝ կրկին նախագահի թեկնածու

2024 թվականի փետրվարի 7-ին Ադրբեջանում կայանալիք արտահերթ նախագահական ընտրություններում իշխող «Յենի Ազերբայջան» կուսակցության թեկնածուն կլինի Իլհամ Ալիևը: Այս մասին հայտնել է նախագահի տեղակալ, Կենտրոնական գրասենյակի ղեկավար Թաիր Բուդագովը: Տեղեկությունը փոխանցում են ադրբեջանական լրատվամիջոցները։

Ադրբեջանը 20 տարի ղեկավարող Ալիևը վերջին անգամ ընտրվել էր 2018-ի ապրիլին՝ 7 տարի ժամկետով: Այդ ընտրությունները նույնպես արտահերթ էին:

Հերթական ընտրությունները նախատեսված էին 2025 թվականի հոկտեմբերին։ Արտահերթ ընտրությունների անցկացման պատճառների մասին ադրբեջանական աղբյուրները չեն հաղորդում։

Իլհամ Ալիևն առաջին անգամ Ադրբեջանի նախագահ է ընտրվել 2003 թվականին, այնուհետև երկու անգամ Սահմանադրություն է փոխել։ Նա վերացրել է երկու անգամից ավելի նախագահ ընտրվելու արգելքը, այսինքն՝ միջինասիական երկրների պես՝ Ադրբեջանում նախագահը ընտրվում է ցմահ:

2024-ին Ալիևը կարող է կրկին առաջադրվել: