Իսրայելը Թուրքիայից օգնություն է խնդրել

Իսրայելի արտաքին հետախուզության ծառայությունը («Մոսադ») դիմել է Թուրքիայի Ազգային հետախուզական կազմակերպությանը (MIT) պաղեստինյան ՀԱՄԱՍ շարժման պատանդ իսրայելցի քաղաքացիներին փրկելու հարցում աջակցելու խնդրանքով: Այս մասին գրում է թուրքական թերթը՝ վկայակոչելով իր աղբյուրները: Տեղեկությունը փոխանցում է ՌԻԱ Նովոստին։

«Հոկտեմբերի 7-ին ՀԱՄԱՍ-ի գործողությունների վերաբերյալ հետախուզական տվյալներ ստանալու հնարավորություն չունենալով՝ «Մոսադը» դիմել է MIT-ին՝ պատանդներին փրկելու հարցում օգնություն ստանալու համար։ MIT-ը, որը ինտենսիվ բանակցություններ էր վարում կատարի, Եգիպտոսի և ԱՄՆ-ի հետ պատանդներին փրկելու համար, հասավ նրան, որ ՀԱՄԱՍ-ը ժամանակավոր հրադադարի ժամանակ ազատ արձակեց Պատանդների մի մասին: «Մոսադը» շնորհակալություն է հայտնել MIT-ին դրա համար»,- գրում է կառավարական շրջանակներին մոտ կանգնած թերթի սյունակագիրը։

Պարբերականը հիշեցրել է, որ 2022 թվականին MIT-ը և Ստամբուլի ոստիկանությունը համատեղ գործողություն են իրականացրել՝ կանխելու իրանական հետախուզության կողմից իսրայելական զբոսաշրջային խմբի դեմ մահափորձը։

Ավելի վաղ ամերիկյան Wall Street Journal թերթը, վկայակոչելով իսրայելցի պաշտոնյաներին, գրել էր, որ Իսրայելի հատուկ ծառայությունները պատրաստվում են Գազայում պատերազմի ավարտից հետո ոչնչացնել պաղեստինյան ՀԱՄԱՍ շարժման առաջնորդներին ամբողջ աշխարհում: Մասնավորապես, իբր ծրագրեր են մշակվում Լիբանանում, Թուրքիայում և Քաթարում ապրող ՀԱՄԱՍ-ի առաջնորդներին հետևելու համար։ Միևնույն ժամանակ, թուրքական հեռուստաալիքներից մեկը, հղում անելով երկրի հետախուզական մարմինների աղբյուրներին, հայտնել է, որ թուրքական հետախուզությունը նախազգուշացրել Է Իսրայելին «լուրջ հետևանքների» մասին Թուրքիայում ապրող ՀԱՄԱՍ-ի անդամների հետապնդման դեպքում: