Իսրայելի հետախուզական ծառայությունները ՀԱՄԱՍ-ի ծրագրերի մասին իմացել են հարձակումից մեկ տարի առաջ. մանրամասներ
Իսրայելի հետախուզական ծառայությունները հարձակումից ավելի քան մեկ տարի առաջ ձեռք էին բերել պաղեստինյան արմատական ՀԱՄԱՍ շարժման հարձակման ծրագիր: Այս մասին հայտնում է The New York Times-ը (NYT)՝ հղում կատարելով համապատասխան փաստաթղթին։
Ըստ հրատարակության՝ փաստաթուղթը, որը կրում է «Երիքովի պարիսպ» ծածկանունը, պարունակում է մոտ 40 էջ։ Այն հստակ նկարագրում էր ներխուժումը, որն իրականացրեց ՀԱՄԱՍ-ը հոկտեմբերի 7-ին, կետ առ կետ։
«Իսրայելցի պաշտոնյաները դա անվանել են հավակնոտ և անտեսել կոնկրետ նախազգուշացումները»,- ասվում է հոդվածում։
Ըստ թերթի՝ պաշտոնյաները խոստովանել են, որ եթե օպերատիվ և լուրջ վերաբերվեին ստացած տեղեկատվությանը, ապա ավելի լավ կպատրաստվեին զինված հակամարտության կամ ընդհանրապես կխուսափեին հարձակումից։
Մերձավոր Արևելքում իրավիճակը սրվեց հոկտեմբերի 7-ին Գազայի հատվածից Իսրայել ՀԱՄԱՍ-ի հազարավոր զինյալների ներթափանցումից հետո, երբ ՀԱՄԱՍ-ը հայտարարեց «Ալ-Աքսա ջրհեղեղ» օպերացիայի մեկնարկի մասին: Ի պատասխան՝ Իսրայելի վարչապետ Բենիամին Նեթանյահուն հայտարարեց, որ երկիրը գտնվում է պատերազմական իրավիճակում։
Իսրայելի «Երկաթե սրեր» գործողության նպատակն էր հետ մղել հարձակումը, ազատել ավելի քան 200 պատանդների, այդ թվում՝ օտարերկրացիների, և ոչնչացնել ՀԱՄԱՍ-ը:
